Macarıstanın baş naziri Peter Macar Ukraynanın yaxın perspektivdə Avropa İttifaqına üzv ola biləcəyinə inanmır. Onun sözlərinə görə, tamhüquqlu üzvlük uzunmüddətli proses tələb edəcək.
Qaynarinfo xəbər verir ki, Macar bu barədə Brüsseldə Avropa Şurasının iclası başlamazdan əvvəl jurnalistlərə açıqlama verib.
Macarın sözlərinə görə, oktyabrın 16-da səhər saatlarında Avropa İttifaqı liderlərinin sammiti çərçivəsində Ukrayna Prezidenti Volodimir Zelenski ilə görüşü nəzərdə tutulub. Macarıstanın baş naziri Zelenski ilə söhbətin 10–15 dəqiqə davam edə biləcəyinə işarə edib.
Macar Ukrayna ilə münasibətlərdə yeni mərhələnin başlanacağına ümid etdiyini bildirib. O, gələcəkdə Bereqovo şəhərində Zakarpatye vilayətində yaşayan macar azlığı ilə də görüşmək istədiyini qeyd edib.
Ukraynanın Avropa İttifaqına üzvlüyü üçün konkret tarix müəyyənləşdirilib-müəyyənləşdirilmədiyi barədə suala cavab verən Magyar belə bir hədəf tarixinin olmadığını deyib.
“Belə bir hədəf tarix yoxdur. Qərbi Balkan ölkələrindən birinin 15 ildir Avropa İttifaqına qoşulmağa çalışdığını, üzvlük danışıqlarına başladığını, lakin başlanğıcla müqayisədə üzvlüyə xeyli yaxınlaşmadığını nəzərə alsaq, bunun üçün konkret müddət müəyyənləşdirməyin mümkün olmadığını və buna ehtiyac olmadığını düşünürəm. Biz nailiyyətlərə əsaslanan üzvlük danışıqlarına inanırıq. Görürük ki, Avropada getdikcə daha çox insan bu yanaşmanı dəstəkləyir”, deyə Macar bildirib.
Bununla yanaşı, o, “daha zəif üzvlük” və ya “daha güclü üzvlük”, “müvəqqəti üzvlük” və yaxud “paralel üzvlük” anlayışlarını qəbul etmədiyini vurğulayıb: “Biz həqiqi üzvlüyün tərəfdarıyıq, lakin bunun üçün 15 və ya 20 il tələb oluna bilər".
Macar Avropaya inteqrasiya etməyə 70 il ərzində çalışan, lakin sonda bu niyyətindən vaz keçən Türkiyəni nümunə göstərib. Beləliklə, onun fikrincə, Ukraynanın Avropa İttifaqına nə vaxt üzv olacağını əvvəlcədən söyləmək mümkün deyil.
Macar əlavə edib ki, Ukraynanın üzvlük danışıqlarına başlaması özlüyündə hələ heç nəyi ifadə etmir. Danışıqların başlanmasına Macarıstanın əvvəlki baş naziri Viktor Orbanın hökuməti razılıq vermişdi.
Macar, həmçinin macar azlığının təhsil hüquqlarının genişləndirilməsi və macar dilindən istifadə imkanlarının artırılması məsələsində irəliləyiş əldə olunduğunu hesab edir.
Aydın
