Dəb artıq uzun illərdir ki, sərt qaydalardan uzaqlaşıb və hər bədən quruluşuna uyğun dəbli görünmək mümkündür. Bununla belə, geyim seçimində bəzi optik xüsusiyyətləri nəzərə almamaq silueti olduğundan daha iri göstərə bilər.

Qayanrinfo xəbər verir ki, mütəxəssislər vizual olaraq əlavə həcm yaradan ən geniş yayılmış səhvləri açıqlayıblar.

Monoxrom geyim kombinasiyaları

Tamamilə eyni rəngdə üst və alt geyimdən ibarət obraz bəzən silueti daha iri göstərə bilər. Eyni tonlar bədəni vahid forma kimi göstərdiyi üçün fiqur daha həcmli görünə bilər.

Bu effekti azaltmaq üçün açıq rəngli köynəyi tünd pencək və cins şalvar kimi kontrast elementlərlə birləşdirmək tövsiyə olunur. Belə kombinasiya silueti vizual olaraq hissələrə ayıraraq daha proporsional görünüş yaradır.

Həddindən artıq bol geyim

Böyük ölçülü geyimlər dəbdə olsa da, onların düzgün kombinasiya edilməsi vacibdir.

Mütəxəssislər bol sviterləri düz biçimli şalvar və ya cinslə, geniş şalvarları isə bədənə oturan üst geyimlə tamamlamanı məsləhət görürlər. Həm üst, həm də alt hissənin həddindən artıq bol olması bədəni olduğundan iri göstərə bilər.

Bundan əlavə, biləklərin, topuqların və ya boynun açıq qalması silueti daha zərif göstərir. Bel xətti aydın olan insanlar kəmərdən və ya köynəyi şalvarın içinə salmaq üsulundan istifadə edə bilərlər.

Kəmərə həddindən artıq diqqət çəkmək

Enli və kontrast rəngli kəmərlər beli vurğulamaq əvəzinə qarın nahiyəsini vizual olaraq daha iri göstərə bilər.

Bu səbəbdən dar və geyimin rənginə uyğun kəmərlərə üstünlük verilməsi tövsiyə olunur. Həmçinin dairəvi və ya oval formalı toka vizual olaraq daha yumşaq görünüş yaradır, düzbucaqlı tokalar isə diqqəti daha çox cəlb edə bilər.

Rəng və naxış seçimi

Açıq rənglər, xüsusilə ağ, bej və sarı tonlar bədənin müəyyən hissələrini daha həcmli göstərə bilər. Bu xüsusiyyətdən düzgün istifadə etməklə bədən proporsiyalarını daha balanslı göstərmək mümkündür.

Naxış seçimi də mühüm rol oynayır. Böyük dama naxışları, enli üfüqi zolaqlar və iri nöqtəli parçalar vizual olaraq həcm yaradır. Əksinə, incə şaquli zolaqlar və "qaz ayağı" naxışı siluetin daha zərif görünməsinə kömək edə bilər.

Parlaq atlas, məxmər və lureks kimi parçalardan hazırlanmış geyimlər də işığı əks etdirdiyi üçün əlavə həcm effekti yarada bilər.

Bədən quruluşuna uyğun olmayan vurğular

Stilistlər bildirirlər ki, geyim seçərkən bədən quruluşunu nəzərə almaq vacibdir. Bir insana yaraşan geyim digərinin üzərində eyni effekti verməyə bilər.

Bel xətti aydın olan şəxslər bədənə oturan geyimlərə üstünlük verə, köynəyi şalvarın içinə salaraq silueti daha zərif göstərə bilərlər.

Bel xətti az nəzərə çarpan insanlar üçün isə çoxqatlı geyimlər daha uğurlu seçim hesab olunur. Məsələn, futbolkanın üzərindən açıq saxlanılmış pencək və ya jaket geyinmək silueti vizual olaraq uzada və daha balanslı göstərə bilər.

Aydın