Yapon dizayner Soşi Otsuki (Soshi Otsuki) Paris Kişi Moda Həftəsində kişilər üçün 2027-ci ilin yaz kolleksiyasını təqdim edib. Kolleksiyada neytral rəng çalarlarında bol kəsimli kostyumlar və rahat geyimlər yay üslubunda yenidən şərh olunub.

Soşi Otsuki Paris Moda Həftəsində gözlənilən debütünü edərək neytral tonlarda rahat kostyumlar, ipək Henley köynəkləri və zolaqlı pambıq pijama dəstlərindən ibarət kolleksiya nümayiş etdirib.

Son illərin yüksələn dizaynerlərindən biri hesab edilən Otsuki ötən il Gənc Dizaynerlər üçün LVMH Mükafatını qazandıqdan sonra onun imzasına çevrilən "yumşaq kostyum" gödəkçələrini astarsız təqdim edib. Onları bol, qabarıq plisəli şalvarlar, dizə qədər uzanan şortlar və kənarları əyri biçimli pijama şortları ilə tamamlayıb.

Dizayner kolleksiya üçün ilhamı uşaqlıq xatirələrindən alıb. O, yay aylarını Naqoya şəhərində nənəsinin evində keçirdiyini, sinif yoldaşının isə Havayda keçirdiyi tətil barədə danışdığını xatırladıb. Sonradan məlum olub ki, həmin sinif yoldaşı da Yaponiyanı tərk etməyib. Bu ideya Otsukini qeyri-adi ikiqat şortlar və knikerboker şalvarlardan ibarət, yumşaq ironiya ilə işlənmiş "tətil" kolleksiyası yaratmağa sövq edib.

"Səyahət zamanı adətən geyinmədiyiniz geyim və rəngləri sınamaq, daha rahat və qeyri-ənənəvi üslubda geyinmək istəyirsiniz”, – deyə Otsuki tərcüməçi vasitəsilə bildirib.

Şounun üslubu da diqqət çəkib. Düyünlənmiş boyun şərfləri, kəmərə bərkidilən çantalar və siqaret tutacağı formasında üzük aksesuarları nümayiş olunub. Defile 1969-cu ildə çəkilmiş La Piscine filminə bəstələnmiş Mişel Leqranın (Michel Legrand) musiqisinin müşayiəti ilə keçirilib.

Sürrealist rəssam Salvador Dalinin əriyən obyektlərini xatırladan motivlərdən istifadə edən dizayner isti havada parçaların təbii görünüşünü estetik elementə çevirib. Kolleksiyada qəsdən qırışlı yaxalar, bükülmüş detallar və açıq buraxılmış kəmərlərdən istifadə olunub.

LVMH Mükafatını qazandıqdan sonra Otsuki Pitti Uomo sərgisində qonaq dizayner kimi iştirak edib və "Zara” ilə əməkdaşlığa başlayıb. Onun bu əməkdaşlıq çərçivəsində hazırladığı kolleksiyanın bəzi məhsulları hələ də onlayn satışdadır.

Soşi Otsuki Yaponiyanın müasir kişi modası dizaynerlərindən biridir. 36 yaşı var. 2015-ci ildə özünün "Soshi Otsuki" adlı kişi geyimləri brendini yaradıb. O, klassik kişi geyimlərini müasir siluetlər, rahat biçimlər və Yapon estetikası ilə birləşdirən yanaşması ilə tanınır. Onun kolleksiyalarında klassik kostyumlar, iş geyimləri və ənənəvi kişi dəbi müasir, sərbəst siluetlərlə yenidən şərh olunur. Dizayner tez-tez uşaqlıq xatirələrindən, gündəlik həyatdan və yapon mədəniyyətindən ilham aldığını bildirir. 2024-cü ildə LVMH Prize for Young Fashion Designers müsabiqəsində Karl Lagerfeld Mükafatına layiq görülüb. Bu mükafat moda sənayesində gənc dizaynerlər üçün ən nüfuzlu beynəlxalq mükafatlardan biridir. Bundan sonra o, İtaliyanın məşhur "Pitti Uomo" kişi moda sərgisində qonaq dizayner kimi iştirak edib və kütləvi bazar brendi "Zara” ilə kapsul kolleksiyası hazırlayıb.

Cavid