ABŞ-da tanınmış astrofizik Karl Qrilmayerin evinin qarşısında qətlə yetirilməsi ilə bağlı cinayət işində yeni mərhələ başlayıb. Qətldə ittiham olunan 29 yaşlı Freddi Snayder məhkəmədə ona qarşı irəli sürülən bütün ittihamları rədd edib.

Qaynarinfo xəbər verir ki, hadisə son illərdə ABŞ-da bəzi alimlərin ölümü və ya itkin düşməsi ilə bağlı müzakirələri yenidən gündəmə gətirib.

ABŞ-ın Kaltecx Texnologiya İnstitutunda çalışan 67 yaşlı astrofizik Karl Qrilmayer bu il fevralın 16-da Kaliforniyadakı evinin qarşısında güllələnərək öldürülüb.

Los-Anceles dairəsinin Şerif Departamenti hadisə ilə bağlı Freddi Snayderi qətl, avtomobilin zorla ələ keçirilməsi və birinci dərəcəli mənzil oğurluğu maddələri üzrə məhkəmə qarşısına çıxarıb. Prokurorluğun iddiasına görə, Snayder hücum zamanı tüfəngdən istifadə edib.

Təqsirləndirilən şəxs keçirilən məhkəmə iclasında ona qarşı irəli sürülən bütün ittihamları rədd edib. İş üzrə növbəti ilkin məhkəmə baxışının iyulun 5-də keçirilməsi gözlənilir. Snayder təqsirli bilinərsə, onu ömürlük həbs cəzası gözləyir.

İstintaqın məlumatına görə, hadisə baş verən gün Snayder əvvəlcə yaşadığı evdə anasından avtomobilin açarlarını istəyib. Anası bundan imtina etdikdən sonra o, tavana atəş açıb, daha sonra avtomobili götürərək ərazini tərk edib.

Hüquq-mühafizə orqanlarının bildirdiyinə görə, Snayder daha sonra Karl Qrilmayerin yaşadığı evin yaxınlığına gedib. İddiaya əsasən, alim qaraj yolunda dayanmış avtomobili görərək çölə çıxıb və həmin vaxt boyun nahiyəsindən güllələnib. Qrilmayer evinin eyvanında həyatını itirib.

Hadisə yerinə gələn təcili tibbi yardım briqadası ona kömək göstərməyə çalışsa da, alimin öldüyü müəyyən edilib. Şerif Departamenti eyni vaxtda yaxınlıqda baş vermiş avtomobilin zorla ələ keçirilməsi hadisəsinin də eyni şübhəli ilə əlaqəli olduğunu açıqlayıb.

Karl Qrilmayer 40 ildən artıq elmi fəaliyyətini astronomiya və kosmik tədqiqatlara həsr etmiş tanınmış alim idi. O, Kaltexdə uzun illər çalışıb və NASA-nın Spitzer Kosmik Teleskopu ilə həyata keçirilən araşdırmalara mühüm töhfələr verib.

Onun elmi fəaliyyəti əsasən qalaktikaların quruluşunun, qaranlıq maddənin və ulduz populyasiyalarının öyrənilməsinə yönəlmişdi. Həmkarları Qrilmayerin elmi işlərini yaradıcı və yenilikçi kimi qiymətləndiriblər. Bildirilir ki, bəzi araşdırmaları Yerdən 160 işıq ilindən daha yaxın məsafədə yerləşən planetlərdə həyat izlərinin axtarışına da töhfə verə bilərdi.

Los-Anceles dairəsinin prokuroru Neytan C. Hokman bildirib ki, Karl Qrilmayer öz evinin qarşısında amansızcasına qətlə yetirilib və bu hadisə onun ailəsinə ağır zərbə vurub. Prokurorluq iş üzrə ədalətin təmin olunması üçün prosesi diqqətlə izləyəcəyini vurğulayıb.

Qrilmayerin qətli ABŞ-da son illərdə müdafiə sənayesi, aviasiya, nüvə tədqiqatları və yüksək texnologiyalar sahəsində çalışan bəzi alimlərin ölümü və ya itkin düşməsi ilə bağlı iddiaların yenidən müzakirə olunmasına səbəb olub.

Müzakirələrdə ehtiyatda olan Hərbi Hava Qüvvələri generalı Uilyam Nil Makkaslandın fevralın 28-də itkin düşməsi də diqqət mərkəzindədir. Bildirilir ki, o, vaxtilə Hərbi Hava Qüvvələrinin Tədqiqat Laboratoriyasına rəhbərlik edib və qabaqcıl materiallar üzrə layihələrlə əlaqəli olub.

Xəbərdə həmçinin NASA-nın Reaktiv Hərəkət Laboratoriyasında çalışan Monika Hasinto Rezanın 2025-ci ildə yürüş zamanı itkin düşməsi, eləcə də Nyu-Meksikoda nüvə obyektləri ilə əlaqəli bəzi şəxslərin telefonlarını, açarlarını və cüzdanlarını geridə qoyaraq yoxa çıxmaları ilə bağlı hadisələr də xatırladılır.

Bununla belə, ABŞ rəsmiləri Karl Qrilmayerin qətli ilə həmin itkin düşmə və ölüm hadisələri arasında hər hansı rəsmi əlaqənin mövcud olduğunu açıqlamayıblar. Hazırda bu hadisələr yalnız ictimai müzakirələrdə səsləndirilən iddialar və diqqət çəkən təsadüflər kimi qiymətləndirilir.

İstintaq isə hazırda birbaşa Freddi Snayderə qarşı irəli sürülən ittihamlar üzərində cəmləşib. Prokurorluq cinayətin motivi ilə bağlı hələlik dəqiq açıqlama verməyib. Bu isə iş ətrafında sualların qalmasına səbəb olur.

Aydın