Hər altı turistdən biri xarici ölkəyə səfəri zamanı yerli mədəni qaydaları pozan davranışlara yol verib. Məsələn, sağ əllə yemək adətinin olduğu ölkələrdə sol əllə yemək yeyib və ya Çində masa arxasında burnunu silib.

Qaynarinfo xəbər verir ki, bu barədə "Daily Express" nəşri yazıb.

Xaricə səyahət edən 2 min yetkin arasında aparılan sorğu göstərib ki, səhv edənlərin 28 faizi ibadət yerlərini ziyarət edərkən çiyinlərini və dizlərini örtməyib. Respondentlərin 26 faizi Şimali Amerikada restoranda bəxşiş verməyi unudub, 21 faizi isə ABŞ-də yolu icazə verilməyən yerdən keçib.

Bununla yanaşı, sorğuda iştirak edənlərin 39 faizi fərqli mədəniyyət və adət-ənənələri yaxından tanımağın uzaq ölkələrə səyahət etmələrinin əsas səbəblərindən biri olduğunu bildirib.

Avropa, Asiya və Şimali Amerikaya təşkil olunmuş turlar təqdim edən "Riviera Travel” şirkətinin nümayəndəsi bildirib:

"Səyahət naməlum olanı qəbul etmək deməkdir. Bu nəticələr göstərir ki, xoş niyyətli turistlər yerli adətləri çox asanlıqla poza bilirlər və çox vaxt bunun fərqinə belə varmırlar. İstər masa arxası etiketi, istər geyim qaydaları, istərsə də yerli qanunlar olsun, ekspertlərin dəstəyi və yaxşı planlaşdırılmış marşrut turistlərə səhv etmək qorxusu olmadan yeni mədəniyyətləri kəşf etmək imkanı yaradır".

Araşdırmaya əsasən, respondentlərin 62 faizi bilmədən qanunu pozmaqdan, 54 faizi isə istəmədən nəzakətsiz görünməkdən ehtiyat etdiyini bildirib.

Bundan əlavə, respondentlərin 42 faizi icazə verilməyən yerlərdə şəkil çəkməkdən, 41 faizi isə dini adətləri yanlış başa düşməkdən narahat olduğunu qeyd edib.

Turistlər səfərə necə hazırlaşırlar?

Sorğu iştirakçılarının 57 faizi səfərdən əvvəl gedəcəkləri ölkə haqqında ətraflı məlumat topladığını bildirib. Respondentlərin 31 faizi isə gündəlik davranışların xarici ölkələrdə tamamilə fərqli qəbul edilməsinə təəccübləndiyini deyib.

İştirakçıların 30 faizi əl işarələrinin müxtəlif ölkələrdə fərqli məna daşıdığını öyrənib. Məsələn, Braziliyada "OK" işarəsi çox vaxt təhqir kimi qəbul edilir.

Turistlərin bilmədiyi digər qaydalar arasında Nigeriyaya mineral su gətirilməsinin qadağan olunması, Yaponiyada bəzi geniş istifadə olunan burun spreylərinə məhdudiyyət qoyulması yer alıb. Barbadosda kamuflyaj geyimlərinin geyinilməsi qadağandır, Sinqapura isə saqqız gətirmək yerli qaydalara ziddir.

Respondentlərin üçdə biri digər turistlərin mədəni səhvlərinə də şahid olduğunu bildirib. Ən çox rast gəlinən hallar restoran və hotel işçilərinə qarşı kobud davranış (52 faiz), ictimai yerlərdə həddindən artıq yüksək səslə danışmaq (51 faiz) və dini və ya mədəni məkanlarda uyğun olmayan geyim seçimi (49 faiz) olub.

Sorğu göstərib ki, sosial səhvlərdən narahat olanların 29 faizi mədəni yanlışlıqlardan qaçmaq üçün bələdçi ilə ekskursiyalara və ya ekspert məsləhətlərinə üstünlük verir.

Respondentlərin 24 faizi təşkil olunmuş qrup turlarının onlara tanımadıqları yerləri daha inamla kəşf etməyə kömək etdiyini, 22 faizi isə təcrübəli bələdçi ilə səyahətin əlavə rahatlıq yaratdığını bildirib.

"Riviera Travel” şirkətinin nümayəndəsi əlavə edib:

"Nəticələr göstərir ki, turistlərin əksəriyyəti yeni yerlərə səfər edərkən hörmətlə davranmağa çalışır, baxmayaraq ki, bəzən səhvlər qaçılmaz olur. Fərqli adətlərə və həyat tərzinə açıq olmaq səyahətin ən gözəl tərəflərindən biridir. Yerli ekspertlərin və peşəkar bələdçilərin dəstəyi, eləcə də təşkil olunmuş qrupun yaratdığı inam turistlərə rahat və təhlükəsiz səyahət imkanı verir".

Turistlərin ən çox yol verdiyi 10 mədəni səhv

1. İbadət yerlərini ziyarət edərkən çiyin və dizləri örtməmək.

2. Şimali Amerikada restoranda bəxşiş verməyi unutmaq.

3. ABŞ-də yolu icazə verilməyən yerdən keçmək.

4. Sağ əllə yemək adətinin olduğu ölkələrdə sol əllə yemək yemək.

5. Kanadada evə daxil olarkən ayaqqabını çıxarmamaq.

6. Almaniyada görüşə və ya işgüzar toplantıya gecikmək.

7. Braziliyada "OK" əl işarəsindən istifadə etmək.

8. Yaponiyada yemək çubuqlarını düyünün içində şaquli vəziyyətdə saxlamaq.

9. Cənubi Koreyada başqalarından əvvəl özünə içki süzmək.

10. Taylandda başqasının başına toxunmaq.

Aydın