Cavanlaşmaq üçün qırmızı işıq maskalarından və digər dəbdə olan kosmetik prosedurlardan istifadə etməkdənsə, daha çox piyada gəzmək, bir qədəh şərab süfrəsi arxasında ünsiyyət qurmaq və bitki mənşəli qidalara üstünlük vermək məsləhətdir.
Qaynarinfo xəbər verir ki, “Euronews”un məlumatına görə, sağlamlığı və uzunömürlülüyü dəstəkləmək üçün ən yaxşı hesab edilən Avropa istiqamətləri məhz belə həyat tərzi təklif edir. Reytinqə Maltanın paytaxtı Valetta başçılıq edib.
Məqalədə bildirilir ki, uzunömürlülük mövzusuna maraq sürətlə artır. Peptidlər, qırmızı işıq terapiyası və ömrü uzatmağın digər üsulları getdikcə daha çox müzakirə olunur. Lakin bunun üçün bahalı cihazlardan və ya qida əlavələrindən istifadə etmək mütləq deyil. Daha vacib olan sağlam həyat tərzinin əsas prinsiplərinə riayət etməkdir.
Müəlliflərin qeyd etdiyinə görə, yüz yaşına çatan insanların yüksək sıxlıq təşkil etdiyi “mavi zonalar” adlanan bölgələrin sakinləri də məhz belə yaşayırlar.
Avropada rəsmi olaraq iki belə zona müəyyən edilib: Yunanıstanın İkariya adası və İtaliyanın Sardiniya adası. Bununla belə, qitədə uzunömürlülüklə əlaqələndirilən vərdişlərin qorunduğu bir çox başqa məkan da var. Burada insanlar çox piyada gəzir, sadə qidalarla qidalanır və sıx sosial əlaqələr saxlayırlar.
Belə həyat tərzini mürəkkəb səhər ritualları olmadan sınamaq istəyənlər üçün villaların icarəsini təşkil edən “CV Villas” şirkəti uzunömürlülük baxımından Avropanın ən yaxşı istiqamətlərinin reytinqini hazırlayıb.
Şirkətin mütəxəssisləri Den Büttnerin “mavi zonalar” haqqında araşdırmasında təsvir etdiyi “Power 9” prinsipləri əsasında 100-ə yaxın məkanı qiymətləndiriblər. Hər bir istiqamətə maksimum 100 bal üzərindən qiymət verilib.
Qiymətləndirmə zamanı bir neçə meyar nəzərə alınıb. Bunlara yüksəklik fərqləri də nəzərə alınmaqla piyada gəzmək üçün əlverişlilik, ildə orta iş saatlarının sayı əsasında həyat tempi, adambaşına düşən vegan yeməklər təklif edən restoranların və şərab zavodlarının sayı, eləcə də adambaşına düşən kafe və kilsələrin sayına əsasən sosial ünsiyyət imkanları daxil olub.
“Piyada gəzinti imkanları, keyfiyyətli qida, icma hissi və bir çoxumuzun alışmadığı daha yavaş həyat tempi sayəsində bu məkanlar dolğun və bərpaedici istirahət üçün lazım olan hər şeyi təklif edir”, – “CV Villas” şirkətinin marketinq şöbəsinin rəhbəri Hanna Marşall bildirib.
Onun sözlərinə görə, Avropada rəsmi olaraq yalnız iki “mavi zona” müəyyən edilsə də, şirkətin turizm sahəsində çoxillik təcrübəsi qitənin bir çox başqa məkanında da oxşar həyat tərzinin qorunduğunu göstərir.
Avropada uzunömürlülük üçün ən yaxşı istiqamətlər
İlk 20 istiqamətdən dördü Maltada yerləşir. Reytinqdə birinci yeri ölkənin paytaxtı Valetta tutub. Şəhər piyada gəzmək üçün əlverişli olması, yemək yemək və insanlarla ünsiyyət qurmaq üçün çoxsaylı məkanları ilə seçilib. Reytinq müəlliflərinin fikrincə, burada gündəlik fiziki aktivlik və balanslı həyat ritmi uzunömürlülüyə kömək edə biləcək şəkildə birləşir.
İkinci yeri Yunanıstanın Paksos adası tutub. Ada sakinlər arasındakı sıx sosial əlaqələrə, tələsmədən yaşamaq imkanlarına və piyada gəzinti marşrutlarına görə fərqlənir. Adanın toxunulmamış təbiəti turistlərə gündəlik qayğılardan uzaqlaşmağa, dincəlməyə və yerli həyat ritminə uyğunlaşmağa imkan verir.
Üçüncü yerdə Fransanın Sen-Trope şəhəri, dördüncü yerdə isə reytinqin gözlənilməz iştirakçısı olan Macarıstanın Eger şəhəri qərarlaşıb.
Bu tarixi şəhər piyada gəzmək üçün əlverişlidir. Burada insanlar arasında yemək süfrəsi arxasında bir araya gəlmək və alkoqollu içkilərdən ölçülü şəkildə istifadə etmək ənənəsi də mövcuddur. Yerli sakinlər şam yeməyində toplaşaraq məşhur “Buğa qanı” adlı qırmızı şərablarını bölüşürlər. Belə sosial ünsiyyət uzunömürlülüyə töhfə verə biləcək amillərdən biri hesab olunur.
Avropada uzunömürlülük üçün ən yaxşı 20 istiqamət
1. Valetta, Malta
2. Paksos, Yunanıstan
3. Sen-Trope, Fransa
4. Eger, Macarıstan
5. Mdina, Malta
6. İbiza, İspaniya
7. Taormina, İtaliya
8. Lefkada, Yunanıstan
9. Budva, Monteneqro
10. Dinqıl, İrlandiya
11. Nesebır, Bolqarıstan
12. Bad-İşl, Avstriya
13. Piran, Sloveniya
14. Alesund, Norveç
15. Sent-Culians, Malta
16. Qotso, Malta
17. Ksamil, Albaniya
18. Levoça, Slovakiya
19. Bordo, Fransa
20. Novi-Sad, Serbiya
Aydın
