İspaniyanın Əndəlüs bölgəsindəki milli parkda “yanğınsöndürən eşşəklər” saxlanılır. Onların vəzifəsi quru otları yeməklə meşə yanğınlarının qarşısını almağa kömək etməkdir. Bu heyvanlar 2014-cü ildən etibarən quru bitki örtüyünü təmizləyərək təbii yanğınəleyhinə zolaqlar yaradırlar.
Qaynarinfo "Times of India"ya istinadən xəbər verir ki, hər şey ağır şəraitdə saxlanılan ilk eşşəyin xilas edilməsi ilə başlayıb. Hazırda 18 eşşək UUNESCO-nun Dünya İrsi siyahısına daxil olan və Avropanın ən mühüm bataqlıq ərazilərindən biri sayılan Donana Milli Parkının ətrafında fəaliyyət göstərir.
Mart ayından noyabradək eşşəklər hər gün parkın ətrafında əvvəlcədən seçilmiş ərazilərdə təxminən yeddi saat vaxt keçirirlər. Onlar qidalanarkən quru otları, kolları, alaq otlarını və İspaniyanın isti yay aylarında asanlıqla alışa biləcək digər bitkiləri yeyirlər.
Hər eşşəyə elektrik çəpəri ilə əhatə olunmuş, uzunluğu 40, eni 15 metr olan ərazi ayrılır. Birlikdə onlar təmizlənmiş dəhlizlər sistemi yaradır və bu sahələr təbii yanğınəleyhinə zolaq rolunu oynayır.
Nəticələr də özünü göstərir. Layihənin başlanmasından ötən 12 il ərzində eşşəklər yanğın baş verdiyi halda onun yayılmasının qarşısını almağa kömək edən təmizlənmiş ərazilər şəbəkəsi yaradıblar. Bunun sayəsində parkda meşə yanğınları demək olar ki, baş verməyib.
Layihənin uğuru İspaniyanın digər bölgələrində və xaricdə də oxşar təşəbbüslərin həyata keçirilməsinə səbəb olub. Kataloniyada 62 xilas edilmiş eşşəkdən ibarət başqa bir qrup meşələrin təmizlənməsi üçün istifadə olunur.
Bu təşəbbüslər ənənəvi biliklərin müasir təbiəti mühafizə məqsədləri ilə birləşdirilməsinin ekoloji problemlərin həllinə necə kömək edə biləcəyini göstərir.
Aydın
Şərhlər