ABŞ-ın Kanada məhsullarına tətbiq etdiyi yeni gömrük tarifləri Vaşinqton və Ottava arasında onsuz da gərgin olan münasibətləri daha da kəskinləşdirib. ABŞ Kanada mənşəli təxminən 20 milyard dollar dəyərində bəzi məhsullara 50 faiz gömrük rüsumu tətbiq edib.

Qaynarinfo xəbər verir ki, Kanada Baş naziri Mark Karni isə Vaşinqtonun şərtlərini “qəbuledilməz” adlandıraraq ABŞ tariflərinə dollar-dollar qarşılıq verəcəklərini açıqlayıb.

Trampdan “51-ci ştat” eyhamı

Danışıqların nəticəsiz qalmasının ardından ABŞ Kanada məhsullarına yeni tariflər tətbiq edib. ABŞ Prezidenti Donald Tramp “Truth Social” platformasında paylaşdığı açıqlamada Kanada ilə bağlı sərt ifadələr işlədib: “Kanada ştat olmadan ştat olmağın üstünlüklərindən yararlanmaq istəyir. Artıq belə olmayacaq!”

Tramp daha əvvəl də dəfələrlə Kanadanın ABŞ-ın “51-ci ştatı” olması ilə bağlı fikirlər səsləndirib.

Kanada “dollar-dollar” cavab verəcək

Kanada Baş naziri Mark Karni ABŞ-ın yeni tariflərinə cavab veriləcəyini bildirib. Karni “Hücumla üzləşdiyiniz zaman müharibədəsiniz deməkdir; biz hücuma məruz qalmışıq” deyərək Kanadanın ABŞ-ın polad, süd məhsulları, məişət texnikası və elektronika sektorlarına yönəlmiş məhsullarına “dollar-dollar” prinsipi ilə cavab tarifləri tətbiq edəcəyini açıqlayıb.

Yeni tariflərin Əmək Günündən sonra, sentyabrın 8-də qüvvəyə minəcəyi bildirilib.

“Çox şey istədilər, çox az şey təklif etdilər”

Karni ABŞ-ın Kanada ilə danışıqlar zamanı ölkənin suverenliyini və digər dövlətlərlə ticarət sazişləri bağlamaq imkanlarını məhdudlaşdıran şərtlər irəli sürdüyünü deyib.

“Çox şey istədilər, çox az şey təklif etdilər. Bunu qəbul edə bilmərik və istədiklərini də verməyəcəyik”, deyə Kanada hökumətinin başçısı bildirib.

Karni Kanadanın ABŞ tariflərinin Kanada şirkətlərinin Amerika bazarına ixracını iqtisadi baxımdan sərfəli edəcək səviyyəyə əhəmiyyətli dərəcədə endirilməsi müqabilində, xüsusilə polad, alüminium və avtomobil kimi strateji sahələrdə qüvvədə olan bəzi cavab tariflərini ləğv etməyə hazır olduğunu söyləyib.

Lakin o, Kanadanın suverenliyindən güzəştə getməyəcəyini və ölkənin əsas sektorlarının zəiflədilməsinə imkan verməyəcəyini vurğulayıb.

“Kanada ABŞ-dan daha az asılı olur”

Karni Kanadanın dünyanın müxtəlif ölkələri üçün mühüm və üstünlük verilən ticarət tərəfdaşı olduğunu bildirib.

Onun sözlərinə görə, ABŞ Kanadanın digər ölkələrlə yeni ticarət razılaşmaları bağlamaq imkanlarını məhdudlaşdırmağa çalışır.

Kanada baş naziri yaz aylarında ABŞ-ın Kanadaya sahib olmaq məqsədilə ölkəni “çökdürməyə çalışdığı” barədə xəbərdarlıq etdiyini xatırladıb.

Karni bildirib: “Bunun heç vaxt baş verməsinə imkan verməyəcəyimizə söz vermişdim. Bu sözümüzü tuturuq. Kanada getdikcə güclənir və Amerikadan daha az asılı vəziyyətə gəlir. Onların əlimizdən ala biləcəyindən daha çox şeyi artıq özümüz üçün əldə edirik və hələ yolun başlanğıcındayıq.”

Gərginliyin artması dünyanın ən böyük ikitərəfli ticarət əlaqələrindən birinə malik ABŞ və Kanada arasında iqtisadi münasibətlərin gələcəyi ilə bağlı narahatlıqları gücləndirib.

Aydın