Qaynarinfo BBC-yə istinadən xəbər verir ki, ölkəyə hər il 10 mindən az xarici turist səfər edir. Bununla belə, burada fərqli və unikal səyahət təcrübəsi yaşamaq mümkündür.

Nəşr qeyd edir ki, Mavritaniyada turizm infrastrukturu zəif inkişaf edib. Bununla yanaşı, ölkə ilə bağlı təhlükəsizlik narahatlıqları geniş yayılsa da, bəzi Avropa dövlətləri ilə müqayisədə risk səviyyəsinin daha aşağı olduğu bildirilir.

Məqalə müəllifi ölkə boyunca ictimai nəqliyyat və yolsuzluq avtomobilləri ilə üç həftə davam edən fərdi səyahətindən bəhs edir. Marşrut ölkənin əsas balıqçılıq mərkəzi olan liman şəhəri Nuadibudan başlayıb.

Soyuq Kanar cərəyanı sayəsində bu ərazidə balıq və ahtapot ehtiyatları olduqca zəngindir. Limanda minlərlə ənənəvi piroqa qayığı toplaşır və onların sıxlığı hətta kosmosdan belə görünə bilir.

Növbəti dayanacaq ölkə əhalisinin təxminən üçdə birinin yaşadığı paytaxt Nuakşot olub. Yeddi saatlıq avtobus səfərindən sonra yerli sakin müəllifi heç bir ödəniş almadan mənzil başına çatdırıb. O, bunu sadəcə xarici qonaqla söhbət etmək istəyi ilə izah edib.

Müəllif qeyd edir ki, paytaxtda müasir inzibati binalar qumla örtülmüş küçələrlə yanaşı yerləşir. Bu isə şəhərə sanki Sahara səhrasının ortasında salınmış böyük yaşayış məntəqəsi görüntüsü verir.

Paytaxtın yaxınlığında yerləşən Beyla bazarı Afrikanın ikinci ən böyük dəvə bazarı hesab olunur. Mavritaniyada təxminən iki milyon dəvə var və onlar bu gün də kənd təsərrüfatında, eləcə də ucqar ərazilərdə hərbi patrul xidmətində istifadə edilir.

Şərq bölgələrinə səyahət 1970-ci illərdən etibarən tikilməyə başlanan **"Ümid yolu"** (Route de l'Espoir) magistralı ilə davam edib. Nema şəhərinə yol bir sutkadan çox çəkib və sərnişinlər gecəni açıq səma altında, səhrada keçiriblər.

Buradan müəllif UNESCO-nun Dünya İrs Siyahısına daxil edilmiş qədim Ualata şəhərinə yollanıb. Şəhərin meri Sidati Diyehin sözlərinə görə, Mali ilə sərhəddə təhlükəsizlik vəziyyətinin pisləşməsindən sonra turist axını demək olar ki, dayanıb və hazırda bura ildə 30-dan az xarici qonaq gəlir.

Ualata qırmızı gildən tikilmiş memarlıq nümunələri və yerli ailələrin əsrlər boyu evlərində qoruyub saxladıqları qədim əlyazmaları ilə tanınır.

Səyahətin əsas dayanacaqlarından biri də transsəhra ticarəti və islam elminin mühüm mərkəzlərindən sayılan Şinqetti şəhəri olub. VIII əsrdə salınmış şəhər hazırda tədricən qum təpələrinin altında qalır. Qismən qumla örtülmüş tərk edilmiş evlər burada postapokaliptik mənzərə yaradır.

Şəhərdə astronomiya, tibb, həndəsə, poeziya və islam hüququna dair qiymətli əlyazmaların saxlanıldığı tarixi kitabxanalar da fəaliyyət göstərir.

Müəllif səyahətini Atar şəhəri yaxınlığındakı Terjit vahəsində başa vurub. Nəşr qeyd edir ki, sonsuz qum dənizi arasında yerləşən yaşıl vahələr Saharada həyatın davamlılığının rəmzidir və Mavritaniya hələ də kütləvi turizmin kəşf etmədiyi zəngin tarixi və mədəni irsini qoruyub saxlayır.

BBC vurğulayır ki, dünyanın ən ucqar bölgələrini gəzməyin asanlaşdığı bir dövrdə belə, səyyahların çox azının gördüyü ölkələr hələ də mövcuddur və Mavritaniya onlardan biridir.

Aydın