Fransa hökuməti elektron ticarət platformalarında satılan ucuz geyimlərin satışını məhdudlaşdırmaq məqsədilə sürətli moda məhsullarına rüsum tətbiq etməyə başlayıb. Rüsum 2030-cu ilədək hər geyim üçün təxminən 20 avroya çata bilər.

Qayanrinfo xəbər verir ki, çərşənbə axşamından qüvvəyə minən yeni ödəniş iyun ayında qəbul edilmiş və “ultra-sürətli moda” şirkətlərinin fəaliyyətini tənzimləyən qanunun tələblərinə əsaslanır. Qanun “Shein”, “Temu” və “AliExpress” kimi şirkətləri əhatə edir.

Böyük həcmdə ucuz geyim satışı ilə tanınan elektron ticarət nəhəngləri Fransa rəsmiləri tərəfindən sürətli moda bazarının sürətlə böyüməsinə səbəb olmaqda ittiham olunur.

Çinin Ticarət Nazirliyi isə Fransa qanunvericiliyini ayrı-seçkilik xarakterli və ticarət maneəsi kimi qiymətləndirib. Nazirlik tədbirin Ümumdünya Ticarət Təşkilatının (ÜTT) prinsiplərini poza biləcəyini bildirib.

Fransanın dövlət katibi Matye Löfevr “ultra-sürətli modanın” ətraf mühitə və iqtisadiyyata “zərərli təsirlərinin” yaxşı məlum olduğunu deyib.

İyul ayında Löfevrin ofisi rüsumun “H&M” və “Zara” kimi pərakəndə satış şəbəkələrinə şamil edilməyəcəyini açıqlayıb. Bu isə bəzi şəxslərin tədbirin Avropa şirkətlərinə güzəşt etdiyi fikrini irəli sürməsinə səbəb olub.

Qanuna əsasən, “ultra-sürətli moda” iki meyar əsasında müəyyən ediləcək: bazara çıxarılan geyimlərin həcmi və məhsulun təmir xərclərinin onun alış qiymətinə nisbəti.

Hər məhsul üzrə rüsumun məbləği onun bu iki meyar əsasında aldığı qiymətləndirmədən asılı olaraq müəyyən edilmiş şkala üzrə dəyişəcək.

2026-cı il üçün rüsumlar alt paltarına görə 0,50 avrodan başlayır. T-shirt üçün 2 avro, cins şalvar üçün 9 avro, gödəkçə üçün isə 12 avro ödəniləcək.

Rüsum 2030-cu ilədək hər məhsul üçün 19,50 avroya qədər yüksələ bilər. Bununla belə, ödəniş məhsulun vergilər nəzərə alınmadan əvvəlki qiymətinin 50 faizindən çox ola bilməz.

Rüsumların tətbiqi Çində yaradılan və baş ofisi Sinqapurda yerləşən “Shein” şirkətinin Honq-Konq birjasında ilk ticarət günündə 26,2 milyard dollar dəyərində qiymətləndirilməsindən sonra başlayıb.

Bir vaxtlar şirkətin bazar dəyərinin təxminən 100 milyard dollar olduğu təxmin edilirdi. Lakin “Shein” son dövrdə artan rəqabət, ticarət gərginliyi və təchizat zəncirinin etikliyi ilə bağlı suallarla üzləşib.

BBC “Shein”, “Temu” və “AliExpress” şirkətlərinə məsələ ilə bağlı şərh üçün müraciət edib.

“Shein” daha əvvəl BBC-yə bildirib ki, ultra-sürətli modanı hədəfə alan qanunvericiliyin təsiri “Fransadakı istehlakçıların alıcılıq qabiliyyətini daha da zəiflədəcək”. Şirkət bunu yaşayış xərcləri böhranının istehlakçılara artıq təsir etdiyi bir dövrdə əlavə yük kimi qiymətləndirib.

Çinin mülkiyyətində olan elektron ticarət şirkəti “Temu” da Böyük Britaniya və ABŞ siyasətçiləri tərəfindən geniş tənqid olunub.

“Temu”nun nümayəndəsi daha əvvəl BBC-yə bildirib ki, şirkət “Fransa qanunvericiliyinin həll etməyə çalışdığı mühüm ekoloji narahatlıqları qəbul edir”. Bununla yanaşı, şirkət özünün sürətli moda şirkəti olmadığını, marketplace modeli ilə fəaliyyət göstərdiyini və məhsulları özü istehsal etmədiyini vurğulayıb.

Aydın