Hollivudda uşaq yaşlarından qazandığı şöhrətlə tanınan aktyor Dreyk Bell hazırda üzləşdiyi maddi və sosial problemlərlə bağlı açıqlaması ilə gündəmə gəlib. “Drake & Josh” serialının ulduzu aktyorlar həmkarlar ittifaqının tibbi sığorta proqramından yararlana bilmədiyini açıqlayaraq sənətə gəlmək istəyənlərə xəbərdarlıq edib. 40 yaşlı aktyor illərlə işləməsinə baxmayaraq, tibbi sığorta təminatından məhrum qalmasını tənqid edib.
Qaynarinfo xəbər verir ki, Dreyk Bell sosial şəbəkədəki paylaşımında ABŞ-da aktyorları təmsil edən SAG-AFTRA həmkarlar ittifaqının tibbi sığorta proqramına uyğunluq tələblərini yerinə yetirə bilmədiyini göstərən ekran görüntüsünü yayımlayıb. Bildirişdə aktyorun 2025-ci ilin iyulundan 2026-cı ilin iyununadək bəyan etdiyi gəlirin sığorta üçün müəyyənləşdirilmiş minimum həddi ödəmədiyi qeyd olunub.
Paylaşılan məlumata əsasən, Bellin həmin dövr üzrə gəliri 17 min 480,53 dollar təşkil edib. Tibbi sığorta proqramından yararlanmaq üçün tələb olunan 28 min 933 dollarlıq həddə çatması üçün aktyora əlavə 11 min 452,47 dollar qazanmaq lazımdır.
Bu vəziyyətə sərt reaksiya verən Bell aktyor olmaq istəyənlərə çağırış edib. O, paylaşımında illərlə çalışdıqdan sonra belə həmkarlar ittifaqının insanı sığorta təminatından kənarda qoya bildiyini vurğulayıb. Aktyor təşkilatın rəhbəri, “Üzüklərin hökmdarı” film seriyası ilə tanınan Şon Astinə də iradlarını bildirib və ittifaqın idarəçiliyini tənqid edib.
“Drake & Josh” serialının uğuru ona böyük sərvət qazandırmayıb
Dreyk Bellin açıqlamaları Hollivudda məşhur simaların həyatının göründüyü qədər dəbdəbəli olmaya biləcəyini bir daha gündəmə gətirib. Aktyor ötən il də Nickelodeon telekanalında çalışdığı dövrdə imzaladığı müqavilələrin şərtlərindən narazılığını bildirmişdi.
Onun sözlərinə görə, “Drake & Josh” və “The Amanda Show” kimi layihələrdə rol almasına baxmayaraq, qazancı uzunmüddətli maliyyə təminatı yaratmayıb. Bell bildirib ki, çəkilişlərə görə ona birdəfəlik ödənişlər edilib, lakin serialların digər kanallarda təkrar yayımlanmasından əldə olunan gəlirlərdən pay almayıb. Aktyor bu səbəbdən hətta kirayə haqqını ödəməkdə çətinlik çəkdiyi dövrlərin olduğunu da açıqlayıb.
Bell qeyd edib ki, tamaşaçılar televiziyada gördükləri aktyorların hamısının varlı olduğunu düşünürlər. Halbuki ekranda tanınmaq insanın mütləq yüksək gəlir əldə etməsi demək deyil. Onun fikrincə, xüsusilə uşaq yaşlarından sənayedə çalışan bir çox aktyorun maliyyə vəziyyəti ictimaiyyətin təsəvvüründən xeyli fərqlidir.
Hollivudda gəlir bərabərsizliyindən danışıb
Aktyor sənayedə gəlirlərin bölüşdürülməsindəki fərqləri izah etmək üçün “Friends” serialının aktyor heyətini nümunə göstərib. Onun sözlərinə görə, serialın əsas ulduzları yayımlanma dövründə hər bölüm üçün bir milyon dollar qazanırdılar. Serialın təkrar nümayişindən əldə olunan müəllif qonorarları isə onlara sonrakı illərdə də böyük gəlir gətirir.
Bell bildirib ki, bir sıra aktyorlar çəkilişlər başa çatdıqdan sonra da əvvəlki işlərinin təkrar yayımlanması hesabına əhəmiyyətli məbləğlər qazanırlar. Bununla yanaşı, onun kimi bəzi sənətçilər özlərinin iştirak etdiyi layihələrin yenidən nümayişindən əlavə gəlir əldə edə bilmirlər.
Aktyor hesab edir ki, tamaşaçılar Hollivudun parlaq tərəfini görsələr də, sənayenin kommersiya mexanizmləri və müqavilə şərtləri barədə kifayət qədər məlumatlı deyillər. Bellin sözlərinə görə, şirkətlər aktyorların əməyi hesabına böyük gəlirlər əldə edir, lakin bu qazanc hər zaman həmin sənətçilərin özlərinə uzunmüddətli maddi təminat yaratmır.
Digər aktyorlar da eyni problemlə üzləşirlər
Dreyk Bellin açıqlaması aktyorların tibbi sığorta hüququ ilə bağlı müzakirələrin yenidən gündəmə gəldiyi vaxta təsadüf edib. Bundan bir neçə həftə əvvəl “The Princess Diaries” filmi ilə tanınan aktrisa Hizer Matarazzo da SAG-AFTRA-nın tibbi sığorta proqramı üzrə hüququnu itirmək riski ilə üzləşdiyini açıqlamışdı. “I Saw the TV Glow” filminin ulduzu Cek Heyven isə sığorta təminatından yararlanmaq üçün əlavə işlərə ehtiyac duyduğunu bildirmişdi.
Matarazzo öz vəziyyətinin Heyvenin yaşadığı problemlə eyni olduğunu deyərək, bir çox aktyorun oxşar çətinliklərlə qarşılaşdığını vurğulamışdı.
Məlumata görə, SAG-AFTRA-nın tibbi sığorta proqramından yararlanmaq üçün tələb olunan minimum gəlir həddi 2027-ci ildə 28 min 933 dollara yüksələcək. Təşkilat aktyorlar, müğənnilər, rəqqaslar, aparıcılar, dublyaj sənətçiləri və digər media mütəxəssisləri daxil olmaqla, təxminən 160 min nəfəri təmsil edir.
Dreyk Bellin açıqlamaları Hollivudda şöhrətin hər zaman maliyyə sabitliyi yaratmadığını, xüsusilə də köhnə layihələrin təkrar nümayişindən əldə olunan gəlirlərin aktyorlar arasında fərqli bölüşdürüldüyünü göstərən müzakirələri yenidən gücləndirib.
Aydın
